Madaxweyne Erdogan oo booqasho taariikhi ah ku tagay Imaaraadka (Sawirro)

Madaxweynaha Turkiga Recep Tayyib Erdogan ayaa booqashadiisa u horreysay sagaal sano kaddib ku tagay dalka isu tagga Imaaraadka Carabta.

Xiriirka Imaaraatka iyo Turkiga oo sanadihii dhowaa aad u xumaa ayaa soo hagaagayey tan iyo markii booqashada uu ku tagay dalka Turkiga dhaxal-sugaha Abu Dhabi, Sheikh Mohamed bin Zayed Al Nahyan November 2021, kadib casuumaad uu ka helay Madaxweynaha Turkiga.

“Booqashadan ayaa ka tarjumeysa tallaabo muhiim ah oo loo qaaday kor u qaadida xiriirka istaraatiijiyadeed ee sii kordhaya ee u dhexeeya labada saaxiib ee gobolka” ayaa lagu yiri war ka soo baxay dowlada Imaaraadka Carabta.

Turkiga ayaa kaalinta 11-aad kaga jira dalalka ugu waaweyn ee ganacsiga la wadaaga Imaaraadka Carabta, halka Imaaraadku uu yahay saaxiibka 12-aad ee ganacsiga Turkiga ee caalamka iyo ganacsiga ugu weyn ee gobolka Khaliijka.

Waxaa Turkiga ku sugan ku dhawaad 400 oo shirkadood oo Imaaraadka Carabta ah oo leh qeybta hantida maguurtada ah ee ugu sareysa liiska galka maalgashiga ee dalkaas. Imaaraadka ayaa sidoo kale maalgashi ku leh dekedaha Turkiga iyo bangiyada iyo dalxiiska.

Wadarta maalgashiga Imaaraatka ee Turkiga ayaa gaaray ku dhawaad AED18.4 bilyan dhamaadkii 2020, halka maalgashiga Turkiga ee Imaaraadka ilaa bilowgii 2020 uu gaaray in ka badan AED1.3 bilyan. Maalgashiga Turkiga ayaa inta badan ku jira dhismaha, hantida ma guurtada ah, maaliyadda, caymiska, warshadaha iyo teknoolojiyadda macluumaadka.