Taliyaha Ciidamada Dhulka Gen. Maxamed Tahliil Biixi ayaa ciidamada Dowladda uga digay inay dhibaato u geystaan dadka shacabka ah.
Wuxuu sheegay in askarigii qof shacab ah xabad ku rida in tiirka la geynayo, lana qisaasayo.
“Waxaan rabaa halkan inaan uga faa’ideysto dhammaan ciidanka xoogga dalka Soomaaliyeed meel kasta uu joogo, ama ha noqdo mid ilaalo ah oo madax la socdo, askarigii qof shacab ah xabad ku rida wallaahi tiirka ayaa geyneynaa, kamana labalabeynayo” ayuu yiri Generaal Biixi.
Sidoo kale, Generaal Biixi ayaa sheegay in habeenadii lasoo dhaafay ay magaalada Muqdisho uu ka dhaceen falal amnidaro oo aad u fool xun, kuwaasoo qaarkood lagu dilay dhalinyaro waxbartay oo ubaxii dalka ah, wuxuuna hoosta ka xariiqay in tallaabo sharciga waafaqsan laga qaadi doono askarii shacab dhibaateeya.
Taliyaha Ciidamada dhulka Generaal Maxamed Tahliil Biixi ayaa hadalkan ka jeediyay Garoonka diyaaradaha Aadan Cadde, halkaas oo uu ku soo dhoweeynayay cutubyo ka tirsan ciidamada kumaandoska Qaranka ee GorGor oo tababar ku soo qaatay dalka Turkiga.
Booliska Soomaaliya ayaa xalay sheegay in ay hay’adaha amniga gacanta ku soo dhigeen askar dilal ka geystay magaalada Muqdisho, kuwaasoo sharciga la horgeyn doono
Xafiiska Shabakada Allbanaadir.com
Muqdisho Somalia
Allbanaadir@live.com
