Idaacada Andalus ee ku hadasha codka Al-shabaab ayaa caawa baahisay magaca iyo qabiilka dagaalyahankii fuliyey weerarkii lagu khaarijiyey agaasimihii radio Muqdisho Cabdicasiis Africa laguna dhaawacay agaasimihii SNTV.
Dagaalyahankan ayey Al-shabaab magaciisa ku sheegtay Ciise Cabdi Cabdulle oo kasoo jeedo beesha Murusade, kaasoo ku dhashay kuna soo barbaaray degaanka Deri gobolka Galgaduud.
Waxay Idaacaddu sii deysay Fariimo horey looga sii duubay kuwaasoo uu hanjabaado ugu jeediyey shaqaalaha dowlada federaalka Soomaaliya iyo ciidamada shisheeye ee dalka jooga.
Agaasimihii Radio Muqdisho Marxuum Cabdicasiis Maxamuud Guuleed Afrika ayaa dhowr habeen ka hor la dilay ka dib qarax lala beegsaday gaarigiisa.
Waxaa sidoo kale ku dhaawacmay qaraxaas Sharma’arke Maxamed Warsame oo.ah Agaasimaha Telefishinka Qaranka iyo Cabdiqaadir oo wadde u ahaa Agaasimaha.
