Ciidamada ammaanka dowladda federaalka Soomaaliya ayaa gelinkii dambe ee maanta waxay xireen wadooyinka waaweyn ee magaalada Muqdisho qaarkood.
Isu socodka wadooyinka Magaalada gudaheeda ayaa kala xaniban, waxaana wadooyinka Magaalada dhan la soo dhoobay ciidan, kuwaasoo wata gaadiidka dagaalka.
Wadooyinka qaar ayaa lagu arkayaa shacab aad u fara badan oo lugeynayana, iyadoo qaarkood wata agab culus, una hoyanaya xaafado fog.
Arintan ayaa loo sababeynayaa xuska 26-ka Juun oo ah markii Calan Soomaaliyeed oo xor ah laga taagay gayiga Soomaaliya, waxaana caawa ka socda xarunta maamulka gobolka Banaadir Munaasabad maalintan loogu dabaal degayo oo ay ka qeyb galayaan madaxda sare ee dalka.
Munaasabadan oo ka dhaceysa xarunta Maamulka gobolka banaadir ayaa waxaa ku sugan masuuliyiin iyo dadweyne kale, iyadoo la filayo iney goor dhow ku biiraan madaxda sare ee Qaranka, si ay goob jog uga noqdaan calan saarka oo dhici doona caawa saqda dhexe 12:00am.
Xafiiska Shabakada Allbanaadir.com
Muqdisho Somalia
Allbanaadir@live.com
