Xildhibaano katirsan labada Aqal ee Baarlamaanka Federaalka Soomaaliya kana soo jeeda Beesha Hawiye ayaa kulan albaabada u xiran la qaatay Ra’isul Wasaaraha Xukuumada Soomaaliya Xasan Cali Kheyre.
Kulankan labada dhinac dhax marayay ayaa looga hadlayay xariga ciidamada amaanka u geesteen Siyaasiga Cabdirxamaan C/shamuur Warsame oo habeen hore lagu xiray xarunta Hay’ada Nabad Sugida .
Sida aan Wararka ku helnay Xildhibaanada kasoo jeeda Beesha Hawiye ayaa ka codsaday Ra’isul Wasaare Xasan Cali Kheyre in xabsiga laga sii daayo C/raxmaan C/shakuur sidoo kale dowlada raali galin ka bixiso weerarkii gurigiisa lagu qaaday.
Ra’isul Wasaare Xasan Cali Kheyre ayaa si cad ugu sheegay Xildhibaanada uu la kulmay in wax shaqo ah uusan ku laheyn xariga Siyaasiga C/raxamaan C/shakuur, waxa uuna tilmaamay in kiiskaasi ay gacanta ku hayaan Hay’adaha garsoorka dalka.
Xasan Cali Kheyre ayaa ku qanciyay Xildhibaanada in ay ku kalsoonaadaan Garsoorka dalka ayna joojiyaan caadifada iyo xiisada ay abuurayaan, waxa uuna sheegay in uu ka shaqeenayo in garsoor cadaalada ah uu helo Siyaasiga xiran.
Xildhibaanada la kulmay Ra’isul Wasaare Kheyre ayaa qaarkood kulanka ka sheegay hadalo caadifad huwan ,waxa ayna ku hanjabeen qaarkood in xaalada ay ka sii dareyso hadii aan la soo deyn Siyaasiga xiran.
Ugu Dambeyn kulanka labada dhinac dhax maray ayaa kusoo dhamaaday fashil, waxaana Xafiiska Ra’isul Wasaaraha isaga soo tagay Xildhibanao katirsan labada Aqal oo ku hungobay dalabkoodii ahaa in lasoo daayo Siyaasiga C/raxmaan C/shakuur.
Xafiiska Shabakada Allbanaadir.com
Muqdisho Somalia
Allbanaadir@live.com
