Madaxweynaha Jamhuuriyadda Jabuuti Ismaaciil Cumar Geelle ayaa maanta dib ugu laabtay Jabuuti, kaddib safar gaar ah oo uu ku tagay Faransiiska oo isugu jiray nasasho iyo baaritaan caafimaad sida uu horay u shaaciyay Wasiirka Arrimaha Dibadda Jabuuti.
Waxaa garoonka dayuuradaha ku soo dhoweeyay Ra’iisul Wasaaraha Jabuuti iyo Mas’uuliyiin ka tirsan dowladda.
Dowladda Jabuuti ayaa maalmo ka hor beenisay warar lagu faafiyey baraha bulshada oo la xiriira xaaladda caafimaad ee Madaxweyne Ismaaciil Cumar Geelle.
Wararkaas, oo sidoo kale ay weriyeen warbaahinta qaar, ayaa lagu sheegay in madaxweyne Geelle loola cararay dalka Faransiiska, oo xaaladdiisa caafimaad ay liidato.
Waxaa wararkaas waxba kama jiraan ku tilmaamay Wasiirka Arrimaha Dibedda Jabuuti Maxamuud Cali Yuusuf, oo qoraal soo dhigay bartiisa twitter-ka.
“Madaxweyne Ismaaciil Cumar Geelle wuu wanaagsan yahay. Dhammaan wararka la wareejinayo ee ku saabsan xaaladdiisa caafimaad waa kuwa ka fog xaqiiqda,” ayuu yiri Maxamuud Cali Yuusuf.
Wasiirka ayaa sheegay in madaxweyne Geelle uu dhowr maalmood kadib dib u billaabi doono shaqadiisa. “Ma jiraan wax gaar ah oo laga walaaco,” ayuu yiri.
Xafiiska Shabakada Allbanaadir.com
Muqdisho Somalia
Allbanaadir@live.com
