Madaxweynaha Dowlad goboleedka Jubaland Mudane Axmed Maxamed Islaam, ayaa caawa qasriga uu ka degan yahay magaalada Kismaayo kulan kula qaatay Guddiga Doorashooyinka heer Dowlad Goboleed ee Jubaland.
Axmed Madoobe ayaana xubnaha guddiga doorashooyinka uu caawa la kulmay ku booriyay in ay howsha doorashada loo xil saaray u maamulaan si hufan oo caddaalad iyo daahfurnaan leh.
Waxa uuna u sheegay Axmed Madoobe guddiga doorashooyinka heer dowlad goboleed ee Jubbaland in laga doonayo in ay ku shaqeeyaan si daacadnimo ku jirto kana fogaadaan wax kasta oo keeni kara cadaalad daro iyo musuq maasuq.
Guddiga doorashooyinka heer federaal iyo heer dowlad goboleed ayaa isku diyaarinaya qabashada doorashada xildhibaanada labada aqal ee Baarlamanaka federaal oo lagu wado in dhawaan ka dhacaan magaalooyin dalka kuyaala.
