Maxkamada darajada koobaad ee ciidamada qalabka sida ayaa manta xukun dil ah ku riday Abuukar Macalin Axmed Hilowle oo 19-kii March ee Sanadkan dil u geestay nin dhalinyaro ah oo u dalxiis tagay xeebta Jaziira xili uu isku dayay in uu ka dhaco moobeel uu watay.
Ciidamada amaanka deegaanka Jaziira ayaa gacanta kusoo dhigay ninkan gacan ku dhiiglaha ah xili uu isku dayay in uu baxsado, waxa ayna ciidamada kusoo wareejiyeen Hay’adda dambi baarista CID-da oo iyana kusii wareejisay maxkamada ciidamada.
Dhamme Ismaaciil Salaad Maxamed ku xigeenka Xeer ilaaliyaha Ciidamada Qalabka Sida ayaa u sheegay Garsoorayaasha in Eedeysanaha uu dilka u gaystay ku tala gal isla markaasna uu isku dayay in uu Baxsado, sidaas darteed ayuu ka codsaday Garsoorka in lagu xukumo Ciqaab u dhiganto Qodobada ay ku soo Eedeeyeen Abuukar Macalim.
Qareenada u dooday Eedeysanaha ayaa Iyana Maxkamadda ka codsaday in loo Naxariisto Eedeysanaha oo laga qaado diyo Maadaama Marxuumka uusan dhacayn balse uu kaga baqay Naftiisa.
Guddoomiyaha Maxkamadda Darajada Koowaad ee Ciidamada Qalabka Sida Gaashaanle Sare Xasan Cali Nuur Shuute ayaa sheegay in maxkamada xukun dil ah ku riday Abuukar Macalin Axmed oo ah qisaasta dilkii uu u geestay Axmed Cali Nuur .
Xafiiska Shabakada Allbanaadir.com
Muqdisho Somalia
Allbanaadir@live.com
