Maxkamada Ciidamada qalabka sida ee dowlada Somalia ayaa Maanta xukun ku riday ganacsato lagu eedeeyay inay gudaha dalka soo geliyeen Kiimikada iyo Agabyada loo adeegsado qaraxyada, xiriirna la lahaayeen Al-shabaab.
Eedeysanayaasha oo tiradoodu gaarayso 7 xubnood ayaa laba ka mid ah ay yihiin maqane, waxaana dhawaan lasoo taagay Maxkamadda Ciidamada, kuwaasoo la sheegay inay dalka soo geliyeen Kiimikada qaraxyada, una sii gudbin jireen Al-shabaab.
Sidoo kale Xafiiska xeer ilaalinta ayaa Maxkamadda Ciidamada ka codsatay in eedeysanayaasha lagu rido xukuno adag, maadaama dalka ay soo geliyeen waxyaabo halis ah oo khatar ku ah nafta iyo deegaanka.
Maxkamadda Ciidamada ayaa eedeysane Maxamed Cismaan Maxamed ku riday xukun xabsi daa’in ah, halka eedeysanayaasha kala ah Cabdisalaan Cali Faarax, Daahir Cusmaan Maxamed, Khadar Cabdisalaan Maxamed, Maxamed Cabdi Shiikh Cumar iyo Saciid Xuseen Maxamed lagu xukumay min 8 sanno oo xabsi ah, sida uu sheegay guddoomiye Shuute
Guddoomiyaha Maxkamadda Ciidamada qalabka sida Gaashaanle sare Xasan Cali Nuur Shuute ayaa sheegay in la sii deeyay Cabdisalaan Cismaan Maxamed oo lagu waayay dambigii lagu eedeeyey.
Xafiiska Shabakada Allbanaadir.com
Muqdisho Somalia
Allbanaadir@live.com
