Xoogaga Al-Shabaab ayaa weerar gaadmo ah ku qaaday degaano u dhexeeya Tuulada Ceeldheere iyo Magaalada Dhuusamareeb.
Wararku waxay sheegayaan Al-Shabaab ay beegsadeen ciidan Macawisley ah oo iska xilsaaray iney sugnaa amaanka wadada kuwaasoo ku sugnaa meel ku dhow Tuulada Xaayow.
Goob joogayaal ayaa sheegay in Al-Shabaab ay halkaas ku dileen Saddex nin oo ka tirsanaa ciidanka Macawisleyda, ayna dhaawaceen qaar kale ka dib iska horimaad kooban oo halkaas ka dhacay.
Weerarkan oo dhacay caawa Maqribnimadii ayey wararku sheegayaan inuu ahaa mid gaadmo ah oo sidoo kale lagu gubay gaari Saad u siday Macawisleyda.
Waxaa jira warar sheegaya in nolol iyo geeri lagu la’yahay qaar ka mid ah ciidanka Macawisleyda oo loo malaynayo iney wateen xoogagii Al-shabaab ee weerarka soo qaaday.
Ciidamo ka tirsan kuwa Galmudug ayaa bilaabay howgalo ka dhan ah kooxdii Al-shabaab ee weerarka soo qaaday kuwaasoo caawa ka socda hareeraha degaanka uu weerarku ka dhacay.
Xafiiska Shabakada Allbanaadir.com
Muqdisho-Somalia
Allbanaadir@live.com
