Ilaah ha u naxariistee waxaa magaalada Burco ee maamulka Somaliland ku geeriyooday Abwaankii Soomaaliyeed ee caanka ahaa sidoo kale ahaa jilaa si weyn loo jecel yahay Sooraan Ismaaciil Sugule.
Abwaanka ayaa u geeriyooday xanuun mudooyinkan dambe uu la jiifay sida eheladiisa xaqiijiyeen, waxaana geerida Abwaan Sooraan si weyn uga naxay eheladiisa iyo dad kale oo si weyn u yaqaanay aadna u jeclaa jilistiisa.
Raisul Wasaaraha Xukuumada Soomaaliya Maxamed Xuseen Rooble ayaa ka tacsiyadeeyay geerida ku timid Abwaanka, waxa uuna sheegay in uu ahaa Sooraan uu ahaa hal abuur si weyn uga qeyb qaatay wacyi gelinta bulshada.
“Eebbe ha u naxariisto Hal abuurkii, fannaankii iyo jilaagii weynaa ee Sooraan Ismaaciil Sugulle oo ku geeriyooday Burco, Sooraan waxa uu ka mid ahaa hal abuurrada sida weyn uga qeyb qaatay wacyigelinta bulshada Soomaaliyeed fankiisa iyo sheekooyinkiisuna ahaayeen kuwo farriin Xambaarsan” ayuu yiri Raisul Wasaare Rooble
Ilaah ha u naxariistee Abwaan Sooraan ayaa la filayaa in aas balaaraan loo sameeyo, waxaana geeridiisa siyaabo kala duwan uga tacsiyadeeyay masuuliyiin, Abwaano, Jilayaal, fanaaniin iyo qeybaha kala duwan ee bulshada Soomaaliyeed.
Xafiiska Shabakada Allbanaadir.com
Muqdisho Somalia
Allbanaadir@live.com
