Wasaarada Amniga Galmudug ayaa ka tacsiyadeysay dilkii Samafale Sheekh Cali Dheere loogu geystay shalay magaalada Gaalkacyo, iyadoo guddi baaris oo madax banaan u magacaabaysa dhacdada dilkaas.
Wasaaradda Amniga dawlad goboleedka Galmudug waxay tacsi tiiraanyo leh u diraysaa qoyska, qaraabada iyo shacabka gobolka Mudug- Galmudug ee uu ka geeeiyooday AUN samafale Sheekh Cali Axmed Faarax (Sheekh Cali Dheere) oo afduub iyo dil loogu geystay degmada Gaalkacyo.
Marxuumku wuxuu ahaa samafale lagu yaqaanay u adeegidda bulshada gobolka Mudug, asagoo ahaa maamulihii guud ee jamciyadda Imaam Nawawi gobolka Mudug, gacantana ku haayay agoon fara badan barbaarintooda, xanaanayntooda iyo waxbaridooda.
“Wasaaradda amnigu waxay dhalleecaynaysa Afduubka iyo dilka foosha xun ee lagula kacay marxuumka, waxayna ku tilmaamaysaa gabaoodfal iyo xadgudub loo geystay muwaadin bulshada Galmudug qiimo weyn ugu fadhiyay, geeridiisuna ay taabatay dadka reer Galmudug oo dhan” ayaa lagu yiri qoraal ka soo baxay Wasaaradda Amniga dawlad goboleedka Galmudug.
Wasaaradda amnigu ayaa intaas ku dartay in tan iyo markii dilkaas uu dhacay ay aruurinaysay xogta la xiriirta shirqoolka iyo dilka loo geystay marxuum Sheekh Cali Dheere, ayadoo wasaaraddu ka duulaysa mas’uuliyadda ka saaran in dilka marxuumku uu helo cadaalad iyo baaris madax-banaan, waxay soo magaacaabaysaa guddi madax banaan oo baarayaal ah oo heer Galmudug ah, waxayna ehelada marxuumka, Bahda Imaam Nawawi iyo bulshada reer Galmudugba ka codsanaysaa in ay is dejiyaan, kana war sugaan illaa inta ay ka soo baxayso natiijada baarista guddiyadu.
Ugu danabyn, wasaaraddu waxay ballan-qaadaysaa in muddo kooban gudaheed xogta baarista lala wadaagi doono hey’adaha sharciga iyo ehelada, ayadoo ciddii lagu helo in ay ka danbaysay shirqoolkaas ama qeyb ka ahayd la horkeeni doono sharciga sida ugu dhaqsaha badan.
Xafiiska Shabakada Allbanaadir.com
Muqdisho Somalia
Allbanaadir@live.com
