Taliye Xijaar oo hoygiisa ku booqday Musharaxa C/raxmaan C/shakuur (Sawirro)

Taliyaha Ciidanka Booliska Soomaaliya Cabdi Xasan Maxamed (Xijaar), Taliye ku xigeenka Booliska Cusmaan C/llaahi Kaniif iyo Saraakiil kale oo ka tirsan laamaha Booliska ayaa hoygiisa ku booqday Hoggaamiyaha Xisbiga Wadajir ahna Musharrax Madaxweyne C/raxmaan C/shakuur Warsame.

Waxaa kulanka sidoo kale goobjoog u ahaa Guddoomiye ku-xigeenka Xisbiga Wadajir Mudane Sayid Cali Macallin Cabdulle, Guddoomiyihii hore ee Xisbiga Wadajir ahna Xubin ka tirsan hadda Kamaal Guutaale iyo Xoghayaha Maaliyadda Xisbiga Wadajir Shadoor Xaaji Maxamuud iyo xubno kale.

“Ujeedka Kulankan oo ahaa booqasho ayaa sidoo kale looga hadlay xaaladdaha guud ee amniga dalka iyo doorashooyinka” ayaa lagu yiri qoraal kooban oo ka soo baxay Xafiiska Warfaafinta Xisbiga Wadajir.

Taliye Xijaar ayaa la sheegay inuu C/raxmaan C/shakuur ka raali geliyey tabashooyinka uu ka qabo ciidanka Booliska intii ay socotay shaqaaqadii ka dhalatay muddo kororsigii laga laabtay.

Taliyaha Ciidanka Booliska Soomaaliya Cabdi Xasan Maxamed (Xijaar) ayaa sidan oo kale horey hoygooda ugu booqday Madaxweynayaashii hore ee dalka Sharif Shiikh Axmed iyo Xassan Shiikh Maxamuud.