Magaalada Muqdisho ayaa caawa mar kale gashay jawi cabsi leh, waxaana xaafadaha qaar ee magaalada laga dareemayaa dhaq dhaqaaqyo ay wadaan ciidamo iska soo horjeeda oo kawada tirsan dowlada balse aragti ahaan is khilaafsan.
Xaalada magaalada ayaa mar qura laga dareemay xaalad dagaal iyo cabsi kadib markii ciidamo badan uu wato taliyihii hore ee ciidanka booliiska gobolka Banaadir ay gaareen xaafada Shiirke ee degmada Hodan halkaas uu ka dhigtay fariisin ciidan.
Magaalada qeybo kale oo kamid ah ayaa laga dareemayaa dhaq dhaqaaqyo ay wadaan ciidanka dowlada Soomaaliya, waxaana dadka Muqdisho caawa lasoo darsay cabsi hor leh iyaga oo ka cabsi qaba in ay dagaalamaan ciidamada Saadaq Joon iyo kuwa Dowlada .
Rasaas goos goos ah ayaa daqiiqado kahor laga maqlay aaga xaafada Shiirkole, waxaana wararka aan helnay sheegayaan in rasaas iyo qorayga loo yaqaan Sabanka lagu riday gaadiid dagaal ay leeyihiin ciidanka dowlada.
Dadka degan xaafada Shiirkole iyo xaafadaha ku dhaw dhaw ayaa caawa bilaabay qaarkood in ay barakacaan, waxa ayna shacabku ka cabsi qabaan in korkooda ka dhaco dagaal xoogan oo dhax mara ciidamada Dowlada iyo kuwa uu wato Saadaq Joon.
Magaalada ayaana caawa waxaa ka jira xiisad iyo cabsi hor leh, dadka ayaana aad u hadal haya xaalada caawa mar kale soo korortay, iyadoona habeeno kahor sidan oo kale magaalada looga dareemay cabsi dagaal balse markii dambe xaalada la qaboojiyay.
