Dalka Ivory Coast, ayaa hal sano gudihiisa waayay labo ra’isul Wasaare oo muhiim u ahaa kadib markii ay u geeriyoodeen xanuuno lasoo darsay, waxaana sanad gudihiisa la magacaabayaa Ra’isul Wasaarihii sadexaad uu dalkaasi yeesho.
Ra’iisal wasaarihii dalka Ivory Coast, Hamed Bakayoko, ayaa shalay ku geeriyooday dalka Jarmalka isaga oo 56-sano jir ah, waxaana Bakayoko la shaaciyay in uu u geeriyooday cudurka kansarka oo mudo hayay.
Hamed Bakayoko ayaa xilka Ra’isul Wasaaraha dalka Ivory Coasy loo magacaabay bishii July ee sanadkii hore, kadib markii geeri deg deg ah ay ku timid Ra’isul Wasaarihii hore ee dalkaasi Amadou Gon Coulibaly.
Madaxweynaha dalka Ivory Coast, Alassane Ouattara, ayaa sheegay in uu aad uga naxay geerida Ra’isul Wasaare Bakoyoko , waxa uuna tilmaamay in uu ahaa nin halyey ah oo wax badan dalka usoo qabtay.
Siyaasigan geeriyooday ayaa hada isku hayay xilka Ra’isul Wasaaraha iyo Wasiirka difaaca dalka Ivory Cost, waxa uu sidoo kale sanado badan ahaa Wasiirada isgaarsiinta iyo arimaha gudaha dalkaasi, isagoona kaalin muuqata ka qaatay xasiloonida iyo horumarka dalkaasi.
Dalka Ivory Coast ayaana hal sano gudihiisa yeelanaya Ra’isul Wasaarihii sadexaad, waxaana hada xilka Ra’isul Wasaaraha si KMG ah loogu magacaabay Patrick Achi , halka nin la dhashay Madaxweynaha dalkaasi laga dhigay Wasiirka Difaaca.
Xafiiska Shabakada Allbanaadir.com
Muqdisho Somalia
Allbanaadir@live.com
