Hay’adda u doodda xuquuqda aadanaha ee Amnesty International ayaa warbixin ay soo saartay ku sheegtay in boqollaal qof oo rayid ah oo aan hubaysnayn ay ciidammada Eritrea bishii Nofembar ee sanadkii tegay ku xasuuqeen magaalada taariikhiga ah ee Axum ee dalka Itoobiya, intii uu socday dagaalkii Tigray.
Amnesty International ayaa ciidamada Itoobiya & kuwa Eritrea ku eedaysay inay gaysteen dambiyo badan oo dagaal intii ay wadeen dagaalkii ay magaalada kula wareegayeen.
Dowladda Itoobiya ayaanan weli ka jawaabin warbixinta Amnesty International hasa yeeshee Khamiistii ayey sheegtay in goor hore bilowday baaritaanka dambiyadii laga gaystay gobolka Tigray.
Dilal aan sharciga waafaqsanayn, duqeymo aan loo meel dayin iyo boob baaxad leh ayaa ka mid ah tacaddiyada hay’adda Amnesty International ay ku eedeynayso ciidamada Eritrea in ay ka geysteen magaalada Axum, kaddib markii ay ciidamada Itoobiya gacan ka siiyeen in ay dib u qabsadaan magaaladaasi.
Hay’addani Amnesty International ayaa caddeymo ka uruurisay dad ka badbaaday tacaddiyadaasi oo ku sugan gudaha gobolka Tigray iyo xeryo qaxooti oo ku yaal dalka Suudaan.
Amnesty waxay sidoo kale isticmaashay sawirro dhanka satellite-ka ah oo ay sheegeyso in ay muujinayaan xabaal wadareedyo ku yaal agagaarka magaaladaasi. Sida ku cad warbixintan, rabshadaha ayaa intooda badan dhacay 28 iyo 29-kii Nofember, xilligaasi oo ciidamo ka socda dalka Eritrea sida la sheegay ay magaaladaasi baaritaan guri-ka guri ah ka sameeyeen, iyagoo laynayay ragga iyo wiilasha isla markaana si ula kac leh u tooganayay dadka rayidka ah.
Amnesty International ayaa warbixintan cusub ee ay soo saartay ugu baaqday Qaramada Midoobay in baaritaan ay ku sameyso dagaalkii ka dhacay Axum.
Xafiiska Shabakada Allbanaadir.com
Muqdisho Somalia
Allbanaadir@live.com
