Ciidanka milatariga Soomaaliya ee ka howlgala gobolka Baay ayaa howlgal ay sameeyeen gacanta kusoo dhigay dagaalyahano katirsan Al Shabaab oo ku sugnaa tuulooyin hoosyimaada deegaanka Owdiinle.
Saraakiil katirsan ciidanka milatariga oo howlgalka hogaaminayay ayaa sheegay in ay gacanta kusoo dhigeen afar dagaalyahan oo katirsan Al Shabaab oo ay sheegeen in dhibaato ku hayeen shacabka deegaanka.
Waxa ay sheegeen saraakiishan in ciidanka milatariga howlgalka fuliyeen kadib markii ay xog ku heleen in dagaalyahanadan katirsan Al Shabaab dhibaato ku hayaan shacabka ku sugan tuulooyin hoostaga deegaanka Owdiinle.
Xero milatari ay leeyihiin ciidanka dowlada ayaa la geeyay afarta nin ee la sheegay in ay katirsan yihiin Al Shabaab, waxaana xubnahan la sheegay in loo qaadayo magaalada Baydhabo si baaritaano loogu sameeyo.
Ciidanka milatariga iyo kuwa maamulka Koonfur Galbeed Soomaaliya ayaa marar badan howlgalo ay sameeyeen ku sheegay in ay dileen dagaalyahano katirsan Al Shabaab kuwa kalana nolosha kusoo qabteen.
Xafiiska Shabakada Allbanaadir.com
Muqdisho Somalia
Allbanaadir@live.com
