Magaalada Muqdisho waxaa illaa shalay galab ka taagneyd xiisad iyo hadal heyn ka dhalatay xildhibaan C/llaahi Maxamed Nuur oo gaari uu la socday ciidamo ka tirsan Nabad sugidu ku rasaaseeyeen bar control oo ku taalla degmada C/casiis.
Xildhibaan C/llaahi Maxamed Nuur oo ah Guddoomiyaha Kutlada Baarlamanka ee Horu-socod ayaa sheegay inuu ka badbaaday isku day dil, ka dib markii gaarigii uu saarnaa ay rasaas ku fureen Ciidamada Nabadsugida, isagoo falkaas ku eedeeyey iney ka dambeeyeen madaxda sare ee dowlada.
Sidoo kale siyaasiyiinta iyo xildhibaanada mucaaradsan dowlada ayaa si kulul u cambaareeyey falkan, iyagoo sheegay inuu  qeyb ka yahay qorshe dowladu kaga taqaluseyso xubnaha mucaaradsan.
Raisul Wasaaraha Somalia Xasan Cali Kheyre oo isku dayaya inuu xaalada qaboojiyo ayaa wasiirkiisa amniga Maxamed Abuukar Islow u xil saaray inuu baaritaan ku sameeyo dhacdadan hase ahaatee Xildhibaan C/llaahi Maxamed Nuur ayaa ku gacan seyray in wasiir u shaqeeya Khayre loo xilsaaro baaritaanka.
Warar lagu kalsoon yahay ayaa sheegaya in Raisul wasaare Khayre oo dhaqaale adeegsanaya uu iskugu yeeray odayaasha beesha Mudulood gaar ahaan jufada uu ka dhashay Xildhibaan C/llaahi Maxamed Nuur si ay uga qeyb qaataan dejinta xiisadan.
Xukuumada Raisul Wasaare Khayre oo mudadii ay jirtay ku caan baxday iney mar kasta lugaha la gasho dhiiqo siyaasadeed ayey dhacdadan ku noqotay mid waji gabax ah.
Khayre iyo Xukuumada uu hogaamiyo ayaa horey u galay qaladaad badan oo sababay culeysyo siyaasadeed iyo xiisado khal khal geliyey horumarka hanaanka dowladnimo ee dalka.
Waxaa ka mid ahaa dhacdooyinkaas weerarkii hoyga siyaasiga C/raxmaan C/shakuur oo dadkii lagu dilay ay dowladu ka bixisay magdhow lagu qiyaasay 500 oo kun oo dollar.
Dowlada ayaa sidoo kale magdhow ah ku bixisay kiiska sarkaal ka tirsanaa ciidamada dowlada oo la oran jiray Ciise Jiijiile iyo ilaaladiisa oo lagu laayay afaafka hore ee Madaxtooyada .
Dadka u dhuun daloola siyaasada Soomaaliya ayaa sheegaya in ujeedada mar kasta Khayre iyo Xukuumadiisa ay u abuuraan xiisadaha Siyaasadeed ay tahay khibrad xumo iney xukunka ku dheereystaan si indhaha dadka looga mashquuliyo dhaliilaha ay leedadahay dowlada.
Abdirahman Xuseen Mamaan
Xafiiska Shabakada Allbanaadir.com
London-UK
Allbanaadir@live.com
