Baarlamanka Britain ayaa cod buuxa ku ansixiyay heshiiska ka bixitaanka Britain ee Midowga Yurub, waxaana ogolaaday 521 cod.
Ra’iisul Wasaaraha Britain Boris Johnson ayaa goor hore ku booriyey Baarlamanka inay taageeraan heshiiskiisa kaddib ka bixitaanka Britain ee Midowga Yurub.
Wuxuu sheegay in heshiisku uu oggolaanayo in ganacsatada ay xiriir ganacsi oo ballaaran ay la yeeshaan Midowga Yurub, mid ka ballaaran kii markii ay Britain ka tirsaneyd suuqa qura ee Midowga oo ay isaga baxayso Jimcaha.
Boris Johnson ayaa intaas ku daray in heshiisku uusan ahayn dhammaad balse uu yahay bilow. Wuxuu xusay inuu bog cusub ka furi doono taariikhda Britain, uuna waddo fiican u horseedi doono Britain.
Heshiiska ayaa soo afjaraya kala go`id soo bilaabatay afar sano iyo bar kahor markii codbixinta aftida la qaaday lagu go`aamiyay in UK ay isaga bixi doonto Midowga Yurub.
Hoggaamiyeyaasha Midowga Yurub ee Brussels ayaa hore u saxiixay heshiiska. Madaxweynaha Guddiga Yurub Ursula von der Leyen ayaa sheegay inay tahay xilligii Britain la iska illaabi lahaa.
Xafiiska Shabakada Allbanaadir.com
Muqdisho Somalia
Allbanaadir@live.com
