Waxaa saakay Xaafado kuyaala Waqooyiga magaalada Muqdisho ka bilowday banaan baxyo rabshado watay oo looga soo horjeeday Madaxweynaha Soomaaliya Maxamed Cabdulaahi Farmaajo.
Banaan baxayaasha oon sidaa u badneyn ayaa watay boorar ay ku qornaayeen hal kudhigyo ay uga soo horjeedaan Madaxweynaha Soomaaliya , waxa ayna socod ku marayeen xaafado katirsan magaalada Muqdisho.
Ciidamada booliiska ayaana lagu soo waramayaa in rasaas ku fureen dad banaan bax ka dhigayay isgooska Fagax, waxaana rasaastaasi ka dhashay khasaaro dhaawacyo ah oo soo gaaray labo qof oo shacab ah.
Xaafadaha qaar ay ka socdaan banaan baxyada ayaa la arkayay shacabka ay la socdaan ciidamo ku hubeesan qoryo , waxaana jirta cabsi laga qabo in ay isku dhacaan ciidamada la socda dibad baxayaasha iyo ciidamada amaanka.
Dadka dhigaya banaan baxyada ayaa ku qeylinayay ereyo ka dhan ah Madaxweynaha Soomaaliya, waxaana muuqaalo baraha bulshada lagu baahiyay laga arkayay dibad baxayaasha oo gubaya Sawirada Madaxweynaha Soomaaliya.
Banaan baxa saakay ka bilowday qeybo kamid ah magaalada Muqdisho ayaan u balaarneyn sidii la filayay, waxaana dowlada Soomaaliya saakay ciidamo badan soo dhoobtay Wadooyinka Muqdisho si ay uga hortagaan banaan baxyada.
Xaalad kacsanaan ah ayaana maanta laga dareemayaa qeybo kamid ah magaalada Muqdisho, waxaana shacabka ka cabsi qabaan rabshadahan saakay qeybo kamid ah magaalada ka bilowday in ay sii faafaan ayna dhibaato badan abuuraan.
Xafiiska Shabakada Allbanaadir.com
Muqdisho Somalia
Allbanaadir@live.com
