Taliyaha Ciidamada Xoogga dalka Jen. Odawaa Yuusuf Raage ayaa si adag uga hadlay saraakiishii dhawaan lagu laayay weerar ka dhacay duleedka degmada Guriceel.
Jen. Odawaa Yuusuf Raage ayaa sheegay in Ciidamada xoogga ay wadaan howlgallo lagu baadi goobayo dadkii ka dambeeyay dilka saraakiisha Ciidamada, isla markaana uu rajeynayo in gacanta lagu soo dhigo, lana horkeeno cadaalada.
Waxaa uu hadalkiisa intaasi uu ku daray in dilkaas aan lala xiriirin karin Arrimo qabiil, hase yeeshee ay ka dambeeyaan Al-Shabaab oo horay dalka uga geystay weeraro iyo qaraxyo ay ku waxyeeloobeen mas’uuliyiin dowladeed & Shacab.
“Saraakiisha la dilay waxay ahaayeen saraakiil Qaran oo aan qabiil shaqo ku laheyn, qiimo weyn ayeyna ku lahaayeen ciidanka Xoogga dalka ILAAHAY ha u naxariisto” ayuu yiri Taliyaha.
Hadalka Taliyaha ayaa Imaanaya xili weerarkii ka dhacay Galgaduud lagu dilay saraakiil tiradooda gaarayso ku dhawaad 6 qof, kuwaasoo la sheegay in ay ka soo baxeen xerada tababarka Xoosh ee magaalada Guriceel, Maleeshiyaad hubeysan ay rasaaseeyeen, xilli ay marayeen deeganka Balihowd oo u dhexeeya Guriceel iyo Ballanballe.
Xafiiska Shabakada Allbanaadir.com
Muqdisho Somalia
Allbanaadir@live.com
