Kooxo hubeysan ayaa goor dhow xiligii afurka waxay magaalada Muqdisho ku dileen nin ganacsade ahaa oo magaciisa lagu soo gaabiyey Aw Aadan.
Dilkan ayaa ka dhacay agagaarka masjidka C/raxmaan Bin Coof oo ku yaalla degmada Waaberi ee gobolka Banaadir xili marxuumka la dilay uu ku sugnaa meel ku dhow hoygiisa sida dad goob joogayaal ahi u sheegeen allbanaadir.com.
Kooxaha dilka geystay ayaa ka baxsaday goobta, waxaana halkaas gaaray wax yar ka dib ciidamada amaanka.
Marxuumka la dilay ayaa ka mid ahaa sariflayaasha ku ganacsada meel ku dhow isgoyska Dabka ee wadada Maka Al-Mukarama, iyadoo wararka qaarkood ay sheegayaan inuu ka mid ahaa ergooyinkii labo sano ka hor Magaalada Jowhar ku soo doortay Xildhibaanada federaalka ee laga soo doortay Hirshabelle, taasoo loo malaynayo iney tahay sababta ka dambeysa dilka loo geystay.
Al-shabaab ayaa tan iyo markii la guda galay bisha barakeysan ee Ramadaan kordhiyey dilalka iyo weerarada ay ka geysanayaan Magaalada Muqdisho, xalay ayeyna aheyd markii magaalada siyaabo kala duwan loogu dilay labo askari oo ka tirsan ciidamada amaanka.
Xafiiska Shabakada Allbanaadir.com
Muqdisho Somalia
Allbanaadir@live.com
