Waxaa Maanta Garoonka Kubada Cagta ee Eng. Yariisow Stadium ka furmay Tartanka Kubada Cagta ee Degmooyinka Gobolka Banaadir 2020, kaasi oo sanadkaan markii ugu horeysay ay ka qeyb-galayaan Naadi ka socda Degmada Balcad.
Kusimaha Guddoomiyaha Gobolka Banaadir ahna Guddoomiye Kuxigeenka Maamulka iyo Maaliyadda Axmed Xasan Iimaan iyo Wasiirka Magacaaban ee Dhalinyarada iyo Isboortiga Xamsa Maxamed Xamsa ayaa si wadajir ah u furay tartanka sanadkan.
Guddoomiyaha Isboortiga Gobolka Banaadir, Guddoomiye Kuxigeenka Xiriirka Kubada Cagta, Guddoomiyeyaasha Degmooyinka Gobolka Banaadir, Agaasimeyaal kantirsan Dowlada Hoose ee Xamar Cayaartoy hore, Marti Sharaf iyo Qeybaha kala gedisan ee Bulshada ayaa Garoonka ku sugnaa, Waxaana Halkaasi Astaanka Calanka ku tumay Ciidanka Daambeeda Booliska Soomaaliyeed.
Madaxda Gobolka Banaadir ayaa Naadiyada ka qeyb-galaya Tartanka u rajeeyay in ay Cayaar wanaag soo bandhigaan inta uu socdo Tartanka Kubada Cagta ee Degmooyinka Gobolka Banaadir.
Kulankii ugu horeeyay ee lagu furay tartanka kubada cagta degmooyinka Gobolka Banaadir waxaa wada ciyaaray degmooyinka Dharkeenley iyo Cabdicasiis, waxaana hal iyo eber looga adkaaday degmada Dharkeenley oo sanadkii hore koobka qaaday.
Tartanka Degmooyinka gobolka Banaadir ayaana sanadkan xiiso gaar ah leh, waxaana degmooyinka gobolka sanadkan sameeyeen diyaar garow aad u balaaran ay ugu jiraan in mid waliba guulo loo riyaaqo ka gaarto tartankan.
Xafiiska Shabakada Allbanaadir.com
Muqdisho Somalia
Allbanaadir@live.com
