Dalka Indonesia waxaa saakay ka dhacay qaraxyo ismiidaamin ah oo lagu qaaday sadex kaniisad, waxaana qaraxyadaasi fuliyay qoys 7-qof ka koobnaa oo la sheegay in ay xiriir la leeyihiin kooxda Daacish.
Weerarka Ismiidaaminta ah ayaa lagu qaaday Sadex Kaniisadood oo kuyaala magaalada labaad ee ugu weyn dalka Indonesia ee Surabaya, waxaana qaraxyadaasi ku dhintay 13-qof halka ay ku dhaawacmeen dad ka badan 35 qof.
Sida booliisku sheegeen weerarkan waxaa fuliyay qoys ka koobnaa Aabe , Hooyo iyo shan caruur ah ay dhaleen, waxa ayna qoyskan oo waxyaabaha qarxa jirkooda ku xiray weerar ku qaadeen Sadex Kaniisad.
Taliyaha booliska Surabaya, ayaa sheegay in aabaha qoyska iyo saddex wiil oo uu dhalay ay isku qarxiyeen labo kaniisadood, halka xaaskiisa iyo labo carruur ah oo kale ay isku qarxiyeen kaniisad kale, dhamaan qoyskan ayaana ku dhintay qaraxyada ay geesteen.
Weerarkan Ismiidaaminta ah ay fuliyeen halka qoys waxaa masuuliyadeeda sheegtay kooxda Daacish, waxaana weerarkan uu noqonayaa kii ugu dhimashada badnaa ee ka dhaca dalka Indonesia tan sanadkii 2005-tii.
Xafiiska Shabakada Allbanaadir.com
Muqdisho Somalia
Allbanaadir@live.com
