Madaxweynaha Dowladda Puntland Mudane Siciid Cabdullaahi Deni ayaa Shir-guddoomiyey kulanka uu la yeeshay Golaha Wasiirada Dowladda Puntland.
Kulanka oo Madaxweynaha uu ku weheliyay Madaxweyne Ku-xigeenka dowladda Axmed Cilmi Cismaan Karaash, waxaa sidoo kale ka qeybgalay La taliyayaal Madaxweyne.
“Madaxweynaha ayaa Golaha uga warbixiyey safarkii uu ku tegay Dhuusamareeb oo uu kaga qeybgalay Shirka looga hadlayey Doorashada Soomaaliya.
Sidoo kale Madaxweynuhu wuxuu Golaha uga warbixiyey Safarkii uu ku tegay dalka Jabuuti iyo shaqadii wanaagsaneyd ee laga soo qabtay Gobolka Mudug oo Madaxweynuhu Safar ku tegay, isagoo booqday degmooyin iyo deegaamo ka tirsan Gobolkaasi.” Ayuu yiri Afhayeenka Ahna Agaasimaha Warfaafinta Madaxtooyada Mudane Jaamac Dabaraani.
Hay’addaha Dowladda waxaa la faray in Shaqadu ay sidoodii hore kusoo laabato, sida gudashada shaqada iyo saacadaha la imanayo Xafiisyada, Iyadoo lasoo saarayo Hab-raacyo kooban oo Caafimaad kuwaasi oo ku saabsan sida loola noolanayo khatarta xanuunka Covid19.
Hase ahaatee Warar laga helayo ilo wareedyo hoose ayaa sheegaya in shirkaas sidoo kale looga hadlay culeyska Puntland ka soo wajahay beesha caalamka ee la xiriiray diidmadii ay ka muujiyeen ka qeyb galka shirkii Dhuusamareeb 3.
Madaxda Puntland ayey wararku sheegayaan iney go’aansadeen ka qayb galka shir Afraad oo lagu wado in lagu qabto magaalada Muqdisho dhowaan, kaasoo ay qaban-qaabadiisa wadaan beesha caalamka, gaar ahaan Mareykanka, xafiiska Qaramada Midoobay ee Soomaaliya iyo Midowga Yurub.
Xafiiska Shabakada Allbanaadir.com
Muqdisho Somalia
Allbanaadir@live.com
