Maleeshiyaad hubeesan ayaa weerar qorsheesan ku dilay Muwaadiniin u dhashay dalka Faransiiska oo u shaqeenayay Hay’ad gar gaar , waxaana weerarkan si kulul u cambaareeyay masuuliyiin kala duwan.
Weerarkan oo ka dhacay deegaano loo dalxiis tago oo kuyaala gobalka Tillaberi ee Koonfur-Galbeed dalka Niger ayaa lagu dilay lix muwaadin oo u dhashay dalka Faransiiska, darawal iyo turjubaan la socday.
Madaxweynaha dalka Faransiiska Emmanuel Macron oo khadka telefonka kula hadlay Madaxweynaha Niger Mahamadou Issoufou, ayaa si kulul u cambaareeyay weerarkan lagu dilay muwaadiniinta Faransiiska, waxa uuna ku tilmaamay mid fuloynimo ah.
Muwaadiniinta Faransiiska ee lagu dilay dalka Niger ayaa u shaqeenayay hay’ada gargaarka ee loo yaqaan ACTED, lamana yaqaan wali heebta kooxdii ka dambeesay weerarkaas oo cabsi badan abuuray.
