Wasaaradda Gargaarka ee xukuumada Soomaaliya ayaa ka digtay Fatahaado iyo Dabaylo ku dhufta Labada wabi ee Jubba iyo Shabelle iyo qeybom kale oo ka mid ah dalka.
Roobab, Hirar iyo Dabeylo ayaa la filayaa in ay ku soo wajahan yihiin qeybo ka mid ah dalka sida lagu sheegay qoraal ka soo baxay Wasaarada
Roobab xooggan ayey saadaasha toddobada casho ee soo socoto tilmaamaysaa inay ka di’i doonaan qeybo ka mid ah Goballada Koofureed iyo kuwa Woqooyi ee dalka. Sidoo kale Roobab ka da’aya buuralayda Itoobiya ayaa laga cabsi qabaa inay sabab u noqdaan sare u kaca heerka biyaha ee Webiga Shabeelle iyo Jubba taasi oo ay ka dhalan karto fatahaado ka dhaca Magaalooyinka ku hareereysan Webiga sida Jowhar iyo Baladweyne.
Heer cabbirka Webiga Shabeelle ee uu hadda marayo ayaa saameeyay isu socodka gaadiidka iyo dhaqdhaqaaqa ganacsiga ee Magaalada Jowhar ee Gobalka Shabeellada dhexe. Degmada Afgooye oo ay dhawaan saameeyeen roobabkii xagaaga ee aan horey uga dignay ayaa waxaa laga cabsi qabaa in ay mar labaad saameyn ku yeeshaan roobabka la filayo in ay da’aan toddobada cisho ee soo socta, iyadoo wabigu horey u buuxay.
Mowjadaha iyo Hirarka Badda: 7-12 Bisha Ogosto waxaa la saadaalinayaa in Mowjadaha Badda ay sara u kacayaan taas oo sababi karta in ay wax yeelo naf iyo maalba leh u gaysato dadka ku shaqeysta doonyaha yaryar iyo dadka dalxiiska u aada xeebaha; sidoo kale waxay waxyeelo u geysan kartaa dadka ku nool nawaaxiga badda.
Dabeylaha Xagaaga xaalada dabeysha ayaa markasta is badbadaleysa sidaas darteed waxaa laga cabsi qabaa in maalmaha soo socda ay sara u kac ku yimaado Xawaare-socodka dabeysha. Xarunta Qaran ee Ka digista Halis-wadareedka (NMHEWC) waxay si gaar ah uga digeeysaa dhammaan bulshooyinka kala duwan sida; dadka ku nool hareeraha Wabiyada Shabeelle iyo Jubba, kaluumeeysatada iyo dadka ku dhaqan degaannada dhaca Xeebaha in ay ka digtoonaadaan khataraha ku soo wajahan.
Wasaaradda Gargaarka iyo Maareynta Musiibooyinka (WG&MM) waxey ugu baaqeysaa dhamaan maamulladda deegaanaddaas kor ku xusan iyo dhammaan hey’adaha gargaarka ee ka hawlgala deegaannadaas in ay u diyaar garoobaan xaaladdan soo cusboonaatay, ayna taageero u muujiyaan bulshada ku dhaqan xeebaha iyo deeganada barriga ah.
Xarunta waxey si dhaw ula socotaa is badalka xaaladaha, waxeyna idiin soo gudbineysaa waxa soo kordha iyo sida ay isubaddesho xaaladda.
Xafiiska Shabakada Allbanaadir.com
Muqdisho Somalia
Allbanaadir@live.com
