Maxkamada ciidamada qalabka sida ee Soomaaliya ayaa ugu dambeyn saakay wax dambi ah ku weysay Wariye Maxamed Cabduwahaab Abuuja oo mudo shan bilood ah u xirnaa Hay’adad nabad sugida Soomaaliya.
Wariye Abuuja ayaana lagu soo eedeeyay in uu katirsanaa ururka Al Shabaab uuna ka dambeeyay dil haweeney loogu geestay degmada Boondheere, hasa ahaatee dambigaasi lagu soo eedeeyay wariyaha ayaa markii dambe loo waayay wax cadeyn ah.
Guddoomiyaha Maxkamadda Ciidamada Qalabka sida ee Soomaaliya Xasan Cali Nuur Shuute oo ku dhawaaqay Go’aanka Maxkamadda ayaa sheegay in baaris dheer kadib Wariye Abuuja lagu waayay dambi, isaga oo amray in Xabsiga laga sii daayo.
Sii deynta Wariye Abuuja ayaa waxaa soo dhaweeyay ururada saxaafada dalka iyo sidoo kale qoyskiisa, waxa ayna sheegeen in wariyaha oo si xaqdaro ah bilooyin xabsi ugu jiray maanta helay cadaalad.
Dhinaca kale Isutagga Suxufiiyinta Soomaaliyeed ee FESOJ waxey soo dhaweyneysaa go’aanka ay gaartay maxkamadda Ciidamada Qalabka sida oo amartay in la siidaayo Wariye Maxamed Cabdiwahaab Abuuja oo u xirnaa eedeymo aan sal iyo raad laheyn.
