Degaanka Tabeellaha Sheekh Ibraahim oo ka mid ah degaanada ku teedsan wadada Afgooye iyo Muqdisho ayaa waxaa caawa ka dhacay fal argagax leh ka dib markii nin hubeysan uu halkaas ku laayey dad hal qoys ka koobnaa.
Ninkan oo ku hubeysnaa qori Ak-47 ah ayaa sida la sheegay ka tirsanaa ciidamada DF, isagoo rasaas aan kala sooc laheyn ku furey qoys uu hoygooda ku weeraray oo ka koobnaa qiyaastii toban qofood, kuwaasoo noqday wax dhintay iyo wax dhaawacmay.
Goob joogayaal ayaa allbanaadir Online u xaqiijiyey in illaa shan qofood ay ku geeriyootay goobta, halka shan kalena ay dhaawacyo kala duwan soo gaareen.
Meydadka iyo dhaawacyada dadkaas ayaa loo soo qaaday xarunta dhexe ee dembi baarista booliska Soomaaliya ee CID-da iyo goobaha caafimaadka ee magaalada Muqdisho sida wararku nagu soo gaarayaan.
Faahfaahin lagama hayo sababta weerarkan balse dadka degaanka qaarkood ayaa sheegaya in ninka weerarkan geystay uu gabar ka qabay reerka uu xasuuqay, uuna jiray khilaaf iyo muran maalmahan ka dhexeeyey isaga iyo qoyska uu xididka la ahaa.
Ciidamada amaanka DF ayaa goobta gaaray halkaasoo ay ka wadaan baaritaano ay ku baadi goobayaan askariga weerarkan arxan darada ah fuliyey oo goobta ka baxsaday.
Xafiiska Shabakada Allbanaadir.com
Muqdisho Somalia
Allbanaadir@live.com
