Magaalada Hargeysa ee xarunta Maamulka Somaliland wararka naga soo gaaraya ayaa waxay sheegayaan in halkaas lagu gubay Meydadka dad la sheegay iney u dhinteen Cudurka COVID-19.
Degaan lagu magacaabo Xeedho oo ku yaalla Waqooyiga Magaalada Hargeysa ayaa la sheegay in lagu gubay meydadka dad ajaaniib ah oo cudurka u dhintay sida ay dad goob joogayaal ah warbaahinta u sheegeen, iyadoo arrintan haddii la xaqiijiyo ay noqoneyso mid ku cusub Somaliland.
Dadka degaanka qaarkood ayaa ku waramay in duhurnimadii maanta ay arkayeen Meydad degaanka lagu keenayo gaadiid, kadibna la qabad siiyay qab xooggan.
“Waxaa naloo sheegay in dadka la gubay ay ahaayeen ajaaniib magaalada hargeysa ugu dhintay cudurka Coronavirus, arrintan walaac badan ayey nagu abuurtay, waxaana ka cabsi qabnaa iney saameyn ku yeelato caafimaadka guud ee degaanka” ayuu yiri mid ka mid ah odayaasha degaanka oo saxaafada la hadlay.
Maamulka Somaliland ayaan weli ka hadlin dhacdadan la sheegay in lagu gubay dad ajaaniib ah oo u dhintay Cudurka COVID-19, iyadoo arrintan ay ku soo aadeyso xili ay sii kordhayaan kiisaska cudurka COVID-19 ee laga soo sheegayo Somaliland.
Xafiiska Shabakada Allbanaadir.com
Muqdisho Somalia
Allbanaadir@live.com
