Raisul Wasaaraha Itoobiya Abiy Ahmed oo ka qeyb galay shirkii madaxda dowlada Somalia iyo kuwa maamulka Somaliland uga furmay Jabuuti ayaa saaka dib ugu laabtay dalkiisa.
Itoobiya ayaa la sheegay in ay qeyb ka ahayd qaban-qaabadii shirkaas, waxaana uu khudbad uu ka jeediyey furitaanka shirka isagoo Soomaalida ugu baaqay iney jebiyaan derbiga dhexdooda ah, dibna u midoobaan.
Waxaa uu dhowr jeer ku celceliyay ereyga ah walaalahey Farmaaajo iyo Muuse isagoo muujinayay walaaltinimo iyo wadadhalasho, waxaana ku jirtay khudbadiisa (We are blood brothers) oo la micno ah walaalo isku dhiig ah ayaa nahay.
Abiy Ahmed ayaa xusay in meelo badan oo dunida ka mid ah laga heshiiyey dhibaatooyin ka waa-weyn kuwa dhex yaalla Soomaaliya iyo Somaliland, loona baahan yahay in dhinacyadu ay sii wadaan wada xaajoodkooda, soona afjaraan farqiga u dhexeeya.
Dhinaca kale, Maanta ayaa mar kale waxaa sii socon doona wada-hadallada, waxaana ajandaha ugu weyn ee Maanta uu yahay diyaarinta Guddiyo farsamo oo labada dhinac ka socda, kuwaasoo sii wadi doona kulamada, isla markaana fadhigoodu noqon doono Jabuuti.
Wasiirka Arrimaha Gudaha Soomaaliya Cabdi Maxamed Sabriye ayaa sheegay in Somaliland ay shirka ku soo bandhigtay tabasho ay qaban,isla markaana uu rajeynayo in wax wanaagsan la wada gaaro.
Mareykanka iyo Jabuuti ayaa garwadeen ka ah isku keenida Madaxda Dowladda Soomaaliya iyo Somaliland.
Siyaasiyiinta mucaaradka ayaa qaba in arrintan ay Madaxda sare ee dalka u tahay olole doorasho, iyagoo isweydiiyey sababta uu Madaxweyne Farmaajo u dhaqaajin waayey wadahadalka Somaliland mudadii 3-da sano iyo barka aheyd ee uu talada dalka hayey.
Xafiiska Shabakada Allbanaadir.com
Muqdisho Somalia
Allbanaadir@live.com
