Madaxweynaha Koonfur Galbeed Cabdicasiis Xasan Maxamed (Lafta-gareen) iyo wafdi uu hoggaaminayo oo maalintii 2-aad ku sugan magaaladda xuddur ee caasimada gobolka Bakool ayaa maanta booqday askar u dhaawacmay difaaca dalkooda ee ku jirta Isbitaalka degmadaasi, waxaana Madaxweynaha uu dhaawacyada gaarsiiyey deeq lacageed.
Madaxweyne Lafta-Gareen ayaa sidoo kale ku boggaadiyay askarta inay yihiin laf dhabarka uu leeyahay dalka, isla markaana haatan ay ciidamada xoogga dalka ay ku socoto dib u habeyn xooggan, haddii ay ahaan laheyd in la qalabeeyo iyo in xuquuqohooda loo dhameystiro.
“Ciidamada Qalabka sida waxaan dooneynaa inaan dib u qalabeyn ku sameeyno maxaa yeelay dalkaan dadkii hanan lahaa guud ahaan Amniga waa iyaga waxaana dhameystiri doonnaa xuquuqaha ay leeyihiin inaggoo uga mahad celineyno sida ay u gutaan waajibaadka loo igmaday” ayuu yiri Madaxweyne Cabdicasiis Xasan Maxamed (Lafta–gareen).
Madaxweyne Laftagareen waxa uu caafimaad deg deg ah u rajeeyay askartaan dhaawaca ah ee ku sugan Isbitaalka Degmada Xuddur ee Xarunta Gobolka Bakool oo uu dhawaan u tagay sidii go’doonka looga qaadi lahaa.
Duleedka Degmada Xuddur gaar ahaan deegaan lagu magacaabo Abal oo qiyaastii 20 KM u jira waxaa dhawaan ku dagaalamay Ciidamada Dowladda, kuwa Daraawiishta iyo Al-Shabaab, waxaana ka dhashay khasaare dhimasho iyo dhaawac.
Dhinaca kale madaxweynaha ayaa waxa uu xariga ka jaray xarun cusub oo laga hirgeliyey suuqa xoolaha ee degmada xuddur, sidoo kale isaga iyo wafdigiisa waxay kormeer ku tageen dhismayaal ku yaala degmadaasi.
Xafiiska Shabakada Allbanaadir.com
Muqdisho Somalia
Allbanaadir@live.com
