Taliska Miltariga Maraykanka u qaabilsan Africa ee AFRICOM ayaa soo saaray warbixin saddex-bille ah oo loogu talagalay in si hufan loo baadho wararka sheegaya in dad rayid ah ay ku dhinteen duqaymaha ay ciidmada Maraykanka fuliyeen ee lagula dagaalamayo kooxaha xagjirka ah
Warbixintan ayey AFRICOM ku qiratay in weerar Soomaaliya ka dhacay 23-kii February 2019 lagu dilay laba qof oo rayid ah, islamarkaana lagu dhaawacay saddex kale, taasoo ay sheegeen inay aad uga xun yihiin.
Stephen J. Townsend, taliyaha AFRICOM ayaa sheegay in warbixinada noocan ah ujeedada laga leeyahay sidii howlgalada ay sameeyaan ay u noqon lahaayeen kuwo hufan, loona yareyn lahaa khasaaraha rayidka.
Waxaa uu sheegay in xogaha la xiriira in dad rayid ah ay ku dhinteen duqeymaha Maraykanka ay ka mid yihiin warbixinada ay soo gudbiyaan ciidamada, dadka rayidka ah ee degan goobaha duqeymaha laga fuliyey iyo baraha bulshada.
“Waxaan sameyn doonaa bisha soo socota website ay leedahay AFRICOM oo dadweynaha u fududeynaya iney ku soo gudbiyaan xogaha la xiriira duqeymaha Maraykanka kaasoo ka kooban afafka Soomaaliga iyo carabiga” ayuu yiri taliyaha.
Maraykanka ayaa sanadkan sii xoojiyey duqeymaha uu ka wado Somalia ee ka dhanka ah Al-shabaab, kuwaasoo qaarkood ay ku dhintaan dad shacab ah oo aan waxba galabsan.
Xafiiska Shabakada Allbanaadir.com
Muqdisho Somalia
Allbanaadir@live.com
