Mareykanka ayaa baaq kasoo saaray dagaalkii maanta xuduuda dalalka Soomaaliya iyo Kenya ku dhexmaray ciidamada DF iyo kuwa Jubbaland.
Qoraal kooban oo kasoo baxay safaaradda Mareykanka ee Muqdisho ayaa loogu baaqay dhinacyada ku dagaalamaya Beled-Xaawo inay joojiyaan colaada.
“Danjire Yamamoto iyo safaaradda Mareykanka waxay ugu baaqayaan dhamaan dhinacyada iskaga soo horjeeda Belad-Xaawo inay ka fogaadaan iska horimaadyada hubeysan” ayaa lagu yiri qoraalkan oo lagu daabacay barta Twitter-ka ee safaarada Maraykanka
“Labada dhinac waxaa loo baahan yahay in ay dulqaad muujiyaan, Waxaana ku baaqeynaa in xal nabadeed laga gaaro khilaafka, lana joojiyo gacan ka hadalka” ayaa lagu yiri sidoo kale qoraalka kasoo baxay safaaradda Mareykanka ee Muqdisho.
Ciidamada Dowladda Federaalka Soomaaliya ayaa la wareegay magaalada Beled Xaawo ee gobolka Gedo, kaddib markii uu halkaas ka dhacay dagaal culus oo u dhaxeeyay iyaga iyo xoogag daacad u ah maamulka Jubbaland.
Dagaalka ayaa galinkii galabnimadii maanta lasoo afjaray kaddib markii “laga adkaaday” ciidamada Jubbaland, kuwaasoo lagu soo warramay inuu hoggaaminayay wasiirka amniga ee maamulkaas Cabdirashiid Xasan Cabdinuur (Janan).
Wuxuu dagaalkaas oo barqaddimadii maanta qarxay yimid kaddib markii ay muddooyinkii dambe ciidamo iska soo horjeeda gaareen aagaas, iyagoo maalmihii dambena is hor fadhiyay.
Ilaa hadda si dhab ah looma oga khasaaraha rasmiga ah ee ka dhashay dagaalkan, laakiin wariyeyaal ku sugan gobolka ayaa soo tabiyay in dad dhaawacyo ah la gaarsiiyay isbitaalka weyn ee magaalada Mandhera.
Xafiiska Shabakada Allbanaadir.com
Muqdisho Somalia
Allbanaadir@live.com
