Wasiirka amniga Jubbaland Cabdirashiid Xasan Cabdinuur Janan ayaa sheegay inuusan ku sugneyn magaalada Mandera balse uu joogo magaalada Beled Xaawo ee gobolka Gedo.
Waxa uu sheegay inuusan doonayn inuu khilaaf ka dhex abuuro dowladaha deriska ah ee Soomaaliya iyo Kenya.
“Waxaan isku meel joognaa Madaxweyne ku-xigeenka koowaad ee Jubbaland Maxamuud Sayid Aadan iyo saraakiil dhowr ah oo reer Jubbaland ah, hadafkeenuna waxaa yahay inaan soo ceshano gacan ku heynta degmooyinka gobolka Gedo ee dowladdu la wareegtay” ayuu yiri Cabdirashiid Janan oo la hadlay VOA.
Cabdirashiid Janan ayaa sidoo kale sheegay inaysan wax dhibaato ah ku jirin inuu tago dalka Kenya, uuna booqan karo xili walba oo loo baahdo.
Ma jiraan warar madax banaan oo xaqiijinaya sheegashada Janan ee ku saabsan inuu joogo degmada Belad-xaawo ee gobolka Gedo oo ciidamo taabacsan dowlada Somalia ay gacanta ku hayaan.
Hadalkiisa ayaa yimid kaddib markii siyaasiyiinta iyo mas’uuliyiinta kale ee Gobolka Mandera ay ugu baaqeen dawladda Kenya inay hubka ka dhigto ama waddanka ka saarto Cabdirashiid Janan.
Xafiiska Shabakada Allbanaadir.com
Muqdisho Somalia
Allbanaadir@live.com
