Xidiga xulka qaranka Masar iyo kooxda Liverpool ee Mohamed Salah ayaa ku guulaysatay abaal marinta horyaalka Premier League ugu qaalisan ee xidiga sanadka ugu fiican kadib markii uu codbixintii la sameeyay ku garaacay shan xidig oo uu Kevin De Bruyne ku jiray wuxuuna Salah hantiyay abaal marintan kadib xili ciyaareed cajiib ah oo uu Liverpool ku soo qaatay xili ciyaareedkiisii ugu horeeyay.
Mohamed Salah ayaa Liverpool ku soo biiray horaantii xili ciyaareedkan kadib markii ay rekoodhka suuqa kala iibsiga ee kooxdeeda ay u jabisay waxaana jiray dad shaki ka muujinayay in Mohamed Salah oo hore ugu soo hungoobay Chelsea uu markale ku dhibtoodo Premier league balse xidiga ree Masar ayaa taas garoonka ku dhex beeniyay markii uu wacdaro cajiib ah dhigay.
Mohamed Salah oo rekoodho tiro badan soo dhigay isla markanaa soo jabiyay kuwo waqti dheer u yaalay kooxdiisa Liverpool iyo horyaalka Premier league ayaa soo dhaliyay 41 gool oo tartamada oo dhan ah wuxuuna sidoo kale dhaliyay 31 gool oo horyaalka Premier league ee uu abaal marintiisa ugu qaalisan ku guulaystay.
Laakiin sidoo kale Mohamed Salah ayaa dariiqa u saaran in uu ku guulaysto kabta dahabka ah ee gool dhalinta Premier league si la mid ah gool dhalinta Yurub ee kabta dahabka ah ee Yurub oo uu ilaa hada hogaaminayo.
Mohamed Salah ayaa door wayn ku lahaa in Liverpool ay soo gaadhay afar dhamaadka UEFA Champions League isla markaana ay rajo wayn ka qabto in ay Roma soo dhaafi karto si ay u gaadho finalka tartankan wuxuuna sidoo kale door muuqda ku lahaa in Reds ay qarka u saaran tahay in ay xaqiijisato booskeeda UCl ee xili ciyaareedka soo socda.
Mohamed Salah ayaa 33 kulan oo Premier league uu uga soo muuqday kooxdiisa Liverpool waxa uu ku soo lug yeeshay 40 gool oo Premier league ah oo ah 31 gool iyo 9 gool caawineed taas oo muujinaysa sida uu xaqa buuxa ugu lahaa in uu abaal marintan ku guulaysto.
Mohamed Salah ayaa intii uu Liverpool joogay ku soo guulaystay abaal marino heer sare ah wuxuuna ku soo guulaystay abaal marinta xidiga sanadka ee Afrika ugu fiican, abaal marinta xidiga wadamada carabta ugu fiican halka uu xulka qarankiisa Masar ku soo hogaamiyay koobka aduunka oo ay waqti dheer ka maqnaayeen.
Mohamed Salah ayaa abaal marintan ku garaacay xidiga Man City koobka Premier league ku hogaamiyay ee Kevin De Bruyne kaas oo isna si wayn xili ciyaareedkan iskugu muujiyay horyaalka Ingiriiska balse xidiga ree Belgium ayaa Salah aan ku gaadhi karin gool dhalin inkasta oo uu caawinta kaga horeeyo.
Sidii Abaal Marinta Xidiga Sanadka ee Horyaalka Premier league Loogu Soo Kala Guulaystay Xili Ciyaareedyadii Ugu danbeeyay:
2017/18: Mohamed Salah (Liverpool)
2016/17: N’Golo Kante (Chelsea)
2015/16: Riyad Mahrez (Leicester)
2014/15: Eden Hazard (Chelsea)
2013/14: Luis Suarez (Liverpool)
2012/13: Gareth Bale (Tottenham)
Liisika xidiga uu Mohamed Salah abaal marintan kaga guulaystay ee u sharaxnaa ayaa kala ahaa Kevin De Bruyne, Harry Kane, David De Gea, Leroy Sane iyo David Silva.
Mohamed Salah ayaa hambalyo badan oo daafaha dunida ah hawada loo mariyay iyada oo Gary Lineker uu hambalyadiisa sii qadimay ka hor intii aanu PFA si rasmi ah u shaacin iyada oo sawirka Mohamed Salah oo abaal marintan sare u haya xili horeba la sii helay.
W/QÂ Mohamoud BatalaaleÂ
Xafiiska Shabakada Allbanaadir.com
Muqdisho Somalia
Allbanaadir@live.com
