Wararka aan ka heleyno gobolka Jubada Hoose ayaa sheegaya in dagaalyahano aad u hubeesan oo katirsan Al Shabaab xalay saqdii dhaxe weerar culus ku qaadeen xero milatariga Kenya ku leeyihiin deegaanka Kulbiyoow.
Dadka deegaanka ayaa ku waramay in ay maqlayeen jugta hubka culus ee is dhaafsanayeen dagaalyahanada weerarka soo qaaday iyo ciidamada Kenya, weerarka ayeyna sheegeen in uu socday daqiiqado badan.
Weerarka Al Shabaab ku qaadeen xerada Milatariga Kenya ka joogaan deegaanka Kulbiyoow ayaa ku bilowday weerar madaafiic ah waxaana xigay weerar toos ah oo Al Shabaab ku qaadeen xerada.
Lama oga ilaa hada khasaaraha soo kala gaaray dagaalyahanada Al Shabaab iyo ciidamada Kenya , waxaana adag in si madax banaan loo ogaado khasaaraha kala duwan ee labada dhinac kala gaaray.
Weerarkan ayaa imaanaya saacado yar kadib markii Al Shabaab weerar xoogan ku qaaday xero milatari oo kutaala gobolka Lamu ee dalka Kenya, waxaana weerarkaasi uu khasaaro kasoo gaaray ciidamo Mareykan iyo kuwa Kenyan ah oo joogay xerada la weeraray.
Xafiiska Shabakada Allbanaadir.com
Muqdisho Somalia
Allbanaadir@live.com
