Waxaa maanta la filayaa in kulan lawada sugayo ay yeeshaan Madaxweynaha Soomaaliya Maxamed Cabdulaahi Farmaajo iyo labo kamid ah Madaxweynayaashii dalka soo maray ee kala ah Sheekh Shariif iyo Xasan Sheekh.
Sida aan xogta ku heleyno kulanka ayaa ka dhacaya xarunta Madaxtooyada Soomaaliya, waxaana kulanka isku arkaya Madaxweyne Farmaajo iyo Madada Hogaanka Madasha Xisbiyada Qaran Sheekh Shariif iyo Xasan Sheekh.
Kulanka oo ah mid xasaasi ah ayaa looga hadli doonaa arimo ay kamid yihiin xanibaadii Madaxdii hore dowlada kusoo rogtay labo mar ay u dhoofayeen magaalooyinka Kismaayo iyo Baladweyne.
Waxa asidoo kale kulanka la filayaa in looga hadlo xiisada siyaasadeed ee dalka gaar ahaan doorashada la filayo in dalka ka dhacdo 2020-ka oon wali la ogeyn nuuca ay noqoneyso ,iyadoona mucaaradka ka cabsi qabaa in dowlada mudo kororsi sameesato.
Kulanka Villa Soomaaliya ku dhax maraya Farmaajo iyo Hogaanka Madasha Xisbiyada Qaran ayaa sidoo kale la filayaa in looga hadlo doorashada dhawaan la filayo in ay ka dhacdo Galmudug iyo wadooyinka xiran ee magaalada Muqdisho.
Ajandayaasha looga hadlayo kulankan dhax maraya Madaxweynaha Soomaaliya iyo Hogaanka Madasha Xisbiyada Qaran ayaa horey looga dooday kadib kulamo ay yeesheen xubno labada dhinac kala matalayay.
Madaxda dowlada federaalka Soomaaliya ayaa la filayaa in raali galin ka bixiyaan xayiraadihii dhinaca socdaalka ee la saaray Madaxda Madasha Xisbiyada Qaran gaar ahaan safaradii Kismaayo iyo Baladweyne.
Madaxtooyada Soomaaliya ayaa codsaday in kulankan dhaco, waxa uuna kulankan dalabkiisa ka dambeeyay kadib hanjabaadii cusleyd ee dhawaan kasoo yeertay Hogaamiyaha Madasha Xisbiyada Qaran Sheekh Shariif Sheekh Axmed.
Beesha Caalamka ayaa sidoo kale lasoo sheegayaa in madaxda dowlada ku cadaadisay in ay dejiyaan xiisada siyaasadeed ee taagan lana kulmaan Madaxda mucaaradka gaar ahaan Madasha Xisbiyada Qaran.
Waxii warar ah ee kulankan kusoo kordha kala soco Wararkayaga dambe Insha Allah
Xafiiska Shabakada Allbanaadir.com
Muqdisho Somalia
Allbanaadir@live.com
