Ra’isul Wasaaraha Itoobiya Abiy Axmed ayaa ku sugan dalka Jabuuti waxaana uu halkaas u tagay xallinta khilaaf u dhaxeeya dalalka ku jira urur Goboleedka IGAD kaasoo ka dhashay kulan dhowaan ka dhacay Magaalada Adis ababa.
Waxaa kulankaas lagu go’aamiyay sida loo kala qaadanayo xilalka Guddoomiyaha iyo Xoghayaha joogtada ah ee IGAD oo uu dhamaaday muddo xileedkoodii.
Inta badan dalalka ku jira IGAD ayaa isku raacay in labada dal ee Kenya iyo Itoobiya oo kala hayay guddoonka iyo Xoghayaha ay isweydaarsadaan labada xil, iyadoo RW Abiy oo hadda haya xilka Guddoomiyaha IGAD lagu wado inuu xilkaas ku wareejiyo Madaxweynaha Kenya, halka sidoo kale Kenya ay ku wareejin doonto Itoobiya xilka xoghayaha guud ee IGAD oo uu hayey Maxbuub Macalin.
Dowladaha Soomaaliya iyo Jabuuti ayaa qeyb ahaan ka soo horjeestay arrintaas waxaana ay siiba dowladda Jabuuti ku dooday in guddoonka iyo xoghayuhuba noqdaan wareegto marba dal qabto lana joojiyo in Kenya iyo Itoobiya kaliya isku bedelaan, arintaas ayaana sababtay in Ra’isal Wasaaraha Itoobiya Abiye Axmed uu u tago dalka Jabuuti si uu Ismaaciil Cumar Geelle ugu qanciyo xil wareejinta lagu wado in bisha soo socota ka dhacdo Magaalada Nairobi.
Somalia oo dooneysa xilka Xoghayaha IGAD ayeysan u suuragalin illaa hadda, waxaana jira in dowladdu aysan qof rasmi ah magacaaban marka laga reebo Wasiirkii hore ee arrimaha dibadda C/Salaan Hadliye Cumar oo xilkan raadinayey in muddo ah.
Xafiiska Shabakada Allbanaadir.com
Muqdisho Somalia
Allbanaadir@live.com
