Xaflad sagootin ah oo loo sameeyay ardayda ka baxday sanadkan Jaamacadda Jazeera (Daawo Sawirada)

Munaasabad si heer sare ah loo soo agaasimay oo ay ka soo qaybgaleen qaybaha kala duwan ee bulshada laguna sagootinayay ardayda sanadkaan dhamaysay Kulliyadaha kala duwan ee Jaamacadda Jazeera ayaa lagu qabtay Muqdisho

Madax ka socotay labada gole ee Dowladda, qaar ka mid ah Wasiirada, Agaasimayaal, Maamulka Jaamacadda, Barayaasha Jaamacadda, qaar ka mid ah Madaxda Jaamacadaha Dalka, Waalidiin, Golaha Abwaanada iyo Culimaau’diin ayaa ka soo qaybgalay munaasabadda

Ugu horeyn Guddoomiyaha Jaamacadda Jazeera Prof. Salaad Ibraahiim Fiidow oo munaasabadda furay ayaa hambalyo iyo bogaadin u jeedinyay ardayda dhamaysatay waxbarashada heerka 1aad ee Jaamacadda Jazeera, waalidiintii ku soo dhabar adaygtay ardaydaas iyo barayaashaii soo abababiyay, waxna soo baray

Guddoomiyaha Golaha Talada Jaamacadda Jazeera Dr. C/qaadir C/raxmaan Xaaji Aadam oo isna munaasabadda ka hadlay ayaa hambalyo ka dib aad u bogaadiyay shaqada wanaagsan ee ay sida wada jirka ah u qabteen Maamulka Jaamacadda, Macallimiinta iyo Waalidiinta dhashay ardayda la sagootinayo

Dr. Luul Maxamuud Maxamed oo ah Hormuudka Kulliyadda Caafimaadka Jaamacadda Jazeera oo ku hadlaysay afka Hormuudyada kala duwan ee Jaamacadda ayaa ka sheekeysay dadaalada aadka u weyn ee ay wadaan mas’uuliyiinta kala duwan ee Jaamacadda Jazeera iyo sida loo ilaalinaayo dhowrista dhaqanka wanaagsan iyo tayada waxbarashada ardayda Jaamacadda dhigata

Prof. Yaxye Sheekh Caamir oo waalidiinta afkooda ku hadlaayay ayaa qiray tayada iyo waxqabadka Jaamacadda Jazeera, isagoona munaasabadda ka sheegay in ilmihiisa uu ugu dooray Jaamacadda sida ay u ilaalinayso tayada waxbarashada

Wasiir ku xigeenka Wasaaradda Waxbarashada iyo Tacliinta Sare Feysal Cumar Guuleed ayaa hambalyo iyo bogaadin ka dib waxa uu sheegay in ay ku amaanayaa Jaamacadda Jazeera habka wax barista iyo tayada wanaagsan ee waalidiintu ay u qireen, wuxuuna Maamulka Jaamacadda ka codsaday iney joogteeyaan tayadaas

Ugu dambeyn Guddoomiyaha Aqalka Sare ee Dalka Mudane Cabdi Xaashi Cabdullaahi ayaa ku bogaadiyay Maamulka Jaamacadda Jazeera joogtaynta tayada tacliinta sare, isagoona ardayda iyo waalidiinta Jaamacadda Jazeera ugu hambalyeeyay guulaha is daba joogga ah ee ay gaareen

Munaasabaddu marka ay soo idlaatay ayaa waxaa shahaado sharaf la guddoonsiiyay guud ahaan ardaydii kaalmaha hore ka galay Kulliyadaha Jaamacadda Jazeera, iyagoona ku mutaystay dadaaklii dheeraa ee ay soo sameeyeen.