Wasaarada Gaashaandhiga Xukuumada Soomaaliya ayaa shaacisay in ciidamada Kumaandooska ay tababareen Dowlada Imaaraatka qeyb ka yihiin ciidanka xooga Soomaaliyeed si deg deg ahna dowlada ula wareegeyso.
Wasiirka Gaashaandhigga Xukuumada Soomaaliya Maxamed Mursal Sheekh C/raxmaan, ayaa sheegay in ciidamada Imaaraatka Tababareen yihiin ciidamo hoos taga dowlada Soomaaliya kana tirsan Ciidanka Xooga Soomaaliyeed.
Waxa uu sheegay Wasiirka in Dowlada Soomaaliya gaar ahaan Wasaarada Gaashaandhiga si buuxda ula wareegeyso ciidamada tababareen 12-ka April oo ku beegan maalinta aas aaska ciidanka Xooga Soomaaliyeed.
“Ciidamada la tababaray sida ciidanka lagu tababaro Xerada Jeneraal Gordan Imaaraadka ay tababareen, waa ciidan ka tirsan Xoogga dalka Somaliya, ciidankaasi numabaradooda ayaa la siin doonaa, mushaarkoodana dowladda Somaliya ayaa siin doonta, dowladda Somaliya xil ayaa ka saaran ciidanka, Mushaarka Imaaraadka ay bixinayeen waqti ayuu ku ekaa, waqtigiina wuu dhamaaday.” Ayuu yiri Wasiirka Gaashaandhigga Somaliya.
Ugu Dambeyn Wasiirka Gaashaandhigga Soomaaliya ayaa uga mahad celiyay dowada Imaaraatka Xerada ay ka fureen magaalada Muqdisho kuna tababareen ciidamo katirsan Milatariga Soomaaliya.
Hadalka kasoo yeeray Xukuumada Soomaaliya ayaa kusoo aadaya xili uu sii xumaaday xiriirka u dhaxeeya Soomaaliya iyo Imaaraatka , waxaana dhawaan dowlada garoonka Aadan Cadde ku qabatay malaayiin Dollar oo imaaraatka sheegtay in ay mushaar ahaan u siin rabtay ciidamada ay tababareen.
Xafiiska Shabakada Allbanaadir.com
Muqdisho Somalia
Allbanaadir@live.com
