Kooxo hubeysan ayaa caawa fiidnimadii waxay degmada Heliwaa ee gobolka Banaadir ku dileen Haweeney la sheegay inay ka mid aheyd dadka degaanka.
Dilka ayaa ka dhacay agagaarka Ex-shineemo Cabdi Waayeel waxaana dadka degaanka sheegeen in ragga hubeysan ee haweeneyda dilay ay goobta ka baxsadeen.
Lama sheegin magaca haweeneydan balse dadka degaanka qaarkood ayaa ku waramay iney ka tirsaneyd Ururka haweenka degmada Heliwaa, waana taas sababta la aaminsan yahay in nafteeda loo dhaafiyey.
Ciidamada amaanka ayaa sida caadada ah gaaray goobta dilku ka dhacay, iyagoo halkaas ka wada howlgalo lagu baadi goobayo raggii dilkaas ka dambeeyey.
Waa habeenkii labaad ee Muqdisho ay ka dhacayaan dilal lala beegsanayo masuuliyiin iyo dad la shaqeeya Maamulada degmooyinka gobolka Banaadir, xalay ayeyna aheyd markii degmada X/weyne lagu dilay Guddoomiye Waaxeed ka tirsanaa Maamulka degmadaas, iyadoo la dhaawacay masuul kale oo la shaqeynayey.
Xafiiska Shabakada Allbanaadir.com
Muqdisho Somalia
Allbanaadir@live.com
