Wakiilo ka socda Beesha Caalamka iyo dowladaha taageera dowlada federaalka Soomaaliya ayaa goordhaw gaaray magaalada Dhuuso Mareeb ee xarunta Maamul goboleedka Galmudug.
Wasiiro katirsan Xukuumada Soomaaliya, Xildhibaano iyo masuuliyini katirsan maamulka Galmudug ayaa wakiilada beesha caalamka ka socda kusoo dhaweeyay garoonka diyaaradaha magaalada Dhuuso Mareeb.
Wafdigan gaaray Dhuuso Mareeb waxaa hoggaaminayay Wakiilka Qaramada Midoobey u qaabilsan Soomaaliya Mr James Swan, waxaana xubno ka ah wafdigan wakiilo ka socda Midowga Afrika, Midowga Yurub, Safiirada Turkiga, Qatar, Ethiopia, Kenya.
Ra’isul Wasaaraha Soomaaliya ayaa la filayaa in kulamo la qaato wakiiladan ka socda beesha caalamka ee gaaray magaalada Dhuuso Mareeb, waxaana xubnahan la sheegay in ay taageeri doonaan dadaalada uu wado Ra’isul Wasaaraha ee lagu dhisayo Galmudug.
