Madaxweynaha Soomaaliya Maxamed C/llaahi Farmaajo ayaa ku haray magaalada Garowe, kadib markii uu burburay shirkii wadatashiga madaxda dowladda Soomaaliya iyo dowlad Goboleedyada mudada todobaadka ah uga socday magaalada Garoowe.
Wararka ayaa sheegaya in Madaxweyne Farmaajo uu maalmo kale sii joogi doono magaalada Garowe, isla markaana kulamo gaara la yeelan doono madaxda Puntland iyo qeybaha bulshada, isagoo dadaal ugu jira inuu heshiis hoose la galo maamulka Puntland oo hadda u muuqda inuu isaga haray taageerada Axmed Madoobe iyo Axmed Ducaale Xaaf oo ay isbaheysi lahaayeen.
Qorshaha Madaxweyne Farmaajo ugu haray magaalada Garowe ayaa hore u qorsheysnaa, waxaana ahmiyad kale u sii yeelay fashilkii ku yimid shirkii Garowe.
Qorshaha cusub ee Madaxweyne Farmaajo iyo Ra’iisal Wasaare Kheyre ayaa ah inay kala furaan madaxda isbaheysiga lahaa ee Puntland, Galmudug iyo Jubbaland oo laba ka mida ay doorashooyin ku soo fool leeyihiin, waxaana Axmed Madoobe iyo Xaaf Garoonka Garowe ku soo sagootiyey C/raxmaan Faroole iyo xubno kale iyadoo uu ka baaqsaday Madaxweyne Siciid C/llaahi Deni.
Dhinaca kale Ra’iisal Wasaare Xasan Cali Kheyre ayaa dib ugu soo laabtay magaalada Muqdisho, kadib toddobaad uu ku sugnaa magaalada Garowe oo uu kaga qeyb galay shirkii wada tashiga ee fashilka ku dhamaaday.
Xafiiska Shabakada Allbanaadir.com
Muqdisho-Somalia
Allbanaadir@live.com
